Проектот „Византиски монашки центри“ дел од 25-тиот Меѓународен конгрес за византиски студии
Под мотото „Byzantium beyond Byzantium“, раководителот и истражувачкиот тим ги презентираа своите научни согледувања поврзани со проектот.
Од 24 до 29 август, Виена беше домаќин на 25. Меѓународен конгрес за византиски студии, под мотото „Byzantium beyond Byzantium“ – еден од најзначајните настани за светската византологија. Меѓу учесниците од најугледните институции, свое место имаше и научниот кадар на ЈНУ Институт за старословенска култура – Прилеп, претставен со четири излагања низ два дена од конгресот.
На 25 август, во сесијата посветена на доцновизантиската книжевност, д-р Марија Чичева-Алексиќ презентираше труд за присуството на филозофот Плетон и византискиот глас во романот „Η Γυφτοπούλα“.
Истиот ден, во сесијата „Култура и уметност на територијата на Охридската архиепископија“ (модератори д-р Орданче Петров и директорот д-р Александар Василески), д-р Василески ги изложи резултатите за архитектурата и живописот на католиконот на манастирот Трескавец во втората половина на 13 и првата половина на 14 век, а д-р Петров говореше за погребните практики и трансформацијата на сакралниот простор во византиска и поствизантиска Македонија.
На 26 август, д-р Иван Заров ја претстави новата интерпретација на посветниот натпис во охридската црква Богородица Перивлепта, со осврт на ктиторството и уметноста во Охрид во 13 век.
Резултатите произлегуваат од истражувањата во рамките на проектот „Византиски монашки центри во РС Македонија. Традиција и континуитет“. Учеството на Конгресот претставува значајна афирмација на научната работа на Институтот и на македонската византологија на меѓународно ниво.